17_12_08_codkahaweenka.com , somalia

Dowladaha waa weyn ee reer Galgeedka ee ku jira Kooxda Caalamiga ah ee Xiriirka Soomaaliya ayaa sheegay in ay Ra’iisal Wasaarenimada Soomaaliya u aqoonsan yihiin Nuur Xasan Xuseen (Nuur Cadde).

Cali Axmed Jaamac Jengeli oo Wasiirka Arrimaha Dibadda ka ahaa Xukuumaddii hore ee Ra’iisal Wasaare Nuur Cadde, isla markaana ka qeybgalay Shirka ay Kooxda Caalamiga ah ee la xiriirka Soomaaliya ay ku yeelataya New York ayaa sheegay in Dowladihii ay arkeen oo ay ka mid ahaayeen Mareykanka, Ingiriiska, Faransiiska iyo kuwo kale ay u sheegeen in ay Ra’iisal Wasaaraha Soomaaliya u aqoonsan yihiin Nuur Xasan Xuseen (Nuur Cadde).

Cali Axmed Jaamac Jengeli oo u waramayay Laanta Afka Soomaaliga ee BBC-da ayaa sheegay in labo go’aan oo uu soo saaray Madaxweyne Yuusuf oo kala ahaa in uu xilka ka qaaday Ra’iisal Wasaare Nuur Cadde, isla markaana uu Ra’iisal Wasaare u magacaabay Maxamed Maxamuud Guuleed Gacma-dheere uu ahaa mid qar-iska-tuurnimo ah oo aan laga fiirsan, waa sida uu hadalka u dhigaye.

Kooxda Caalamiga ah ee la xiriirka Soomaaliya ayaa waxay ugu baaqeen madaxda sare ee Dowladda Federaalka Soomaaliya in ay khilaafkooda ku xaliyaan Axdiga u degsan Dowladda Federaalka Soomaaliya.

Si kastaba arrintu ha ahaatee, go’aanka ay Kooxda International Contact Group (ICG) ay ka qaadatay qalalaasaha siyaasadeed ee ka dhex taagan Madaxda Dowladda Federaalka Soomaaliya ayaa wuxuu ku soo beegmayaa iyadoo xaaladaha siyaaso iyo ammaan ee Soomaaliya ay yihiin kuwo aan hagaagsaneyn.

Golaha Ammaanka ee Qaramada Midoobay oo isku raacay in Kooxaha Burcad Badeedka Soomaaliya lagula dagaallamo Badda iyo Berriga

17_12_08_codkahaweenka.com , somalia

Golaha Ammaanka ee Qaramada Midoobay ayaa wuxuu isku raacay in Kooxaha Burcad Badeedka Soomaalida lagula dagaallamo Berriga Soomaaliya.

Golaha Ammaanka oo shir ka yeeshay dhibaatada ay Kooxaha Burcad Badeedka ku hayaan Soomaaliya ayaa wuxuu sheegay in haddii kooxahaas lagula dagaallamo kaliya Xeebaha ay ku dhuuman karaan Berriga u dhow xeebaha ay wax ka af-duubtaan.

Laakin Xoghayaha Guud ee Qaramada Midoobay Mr. Ban Ki-moon ayaa shaaca ka qaaday in inta aan la bilaabin howlgalka lagula dagaallamayo kooxaha Burcad Badeedka loo baahan yahay in marka hore ogolaasho laga helo Dowladda Federaalka Soomaaliya oo ah Dowladda haatan ka jirta Soomaaliya.
Markii uu soo baxay go’aanka uu Golaha Ammaanka ee Qaramada Midoobay ka qaatay Burcad Badeedka Soomaalida ayaa qoraal ka soo baxay Xafiiska Ra’iisal Wasaaraha Soomaaliya Nuur Xasan Xuseen (Nuur Cadde) waxaa lagu soo dhaweeyay go’aanka Golaha Ammaanka, iyadoo qoraalkaas lagu xusay in loo baahan yahay in lala dagaallamo Burcad Badeedka si ay Xeebaha Soomaaliya u noqdaan kuwo ammaankooda la isku haleyn karo.

Xeebaha Soomaaliya oo ay ka dilaaceen Kooxo Burcad Badeed ah oo Maraakiibta iyo Doomaha qafaasha ayaa waxaa haatanba ku sugan Maraakiib ay leeyihiin Dowladaha Mareykanka, Ruushka, Faransiiska, Spain, Hindiya iyo kuwo kale oo ka socda Dalalka Midowga Yurub, hayeeshee ilaa iyo haatan waxaa lagu heystaa Xeebaha Soomaaliya Maraakiib dhowr ah oo ay ku jiraan labo Markab oo mid uu wado Hub, midka kalena Saliid Ceyriin oo labo Milyan oo Fuusto gaareysa.

xafiiska codkahaweenka.com