08_11_08_codkahaweenka.com , somalia

Abwaan Maxamed Ibraahim Warsame Hadraawi oo haatan socdaal ku jooga Dalka Canada ayaa isagoo u waramayay Laanta Afka Soomaaliga ee BBC-da waxaa uu ku baaqay in la joojiyo dagaallada ka socda Magaalada Muqdisho.

Abwaan Hadraawi waxa uu sheegay in dagaallada ka socda Magaalada Muqdisho ee dhibaatada badan geystay ay yihiin kuwo macno la’aan ah oo ay uun ku baa’bayaan shacab badan oo aaney jirin wax ay galabsadeen.

“Waxaan ku baaqayaa in aan la sii macaansan dhiigga iyo dhimashada ka dhaceysa magaalada Muqdisho, isla markaana la raadiyo xal lagaga maarmo xabadda. waana ayaan darro weyn oo aan sabab sharci ah loo heynin waxyaabaha ay dagaalladaas u dhacayaan”ayuu yiri Abwaan Hadraawi oo ugu baaqay dhinacyada isku haya Soomaaliya, gaar ahaan Magaalada Muqdisho inay raadiyaan xal aan dagaal ahayn.
Abwaanka waxaa kale oo uu soo hadal qaaday qaraxyadii dhawaan ka dhacay magaalada hargeysa, wuxuuna sheegay in uu si weyn uga xun yahay qaraxyadaas oo ay dad badan ku dhinteen, kuwo kalena ku dhaawacmeen, wuxuuna kuwii u dhintey uu Alle uga rajeeyay in uu Janadii ka waraabiyo, halka kuwii ku dhaawacmay uu caafimaad u rajeeyay.

Arrin kale oo uu Abwaanka uga hadlay wareysiga uu siiyay Laanta Afka Soomaaliga ee BBC-da ayaa waxay ahayd in uu si weyn uga digayo ku dhaqanka heyb- sooca, wuxuuna sheegay in aysan taasi wax qiimo ah lahayn, isagoo weliba caddeeyay in dadka Soomaaliyeed ay yihiin dad walaalo ah oo meel qura ka wada yimid.

Abwaan Hadraawi ayaa had iyo jeeraale waxaa uu ka hadlaa dhibaatada Soomaaliya iyo sidii xal loogu heli lahaa, isagoo ku baaqa in ay waxgaradka iyo qeybaha kala duwan ee Bulshada ay u istaagaan sidii xal nabadeed loogu heli lahaa dagaallada iyo dhibaatooyinka ka jira Soomaaliya.

Ugu dambeyntiina, Abwaan Hadraawi oo horay socdaal nabadeed ugu kala bixiyay Gobollo badan oo ku yaala Dalka Soomaaliya ayaa wuxuu haatan socdaallo ku kala bixinayaa magaalooyinka Dalka Canada, wuxuuna ilaa iyo haatan uu ka qeybgalay labo kulan oo waa weyn oo ka dhacay Magaalooyinka Toronto iyo Ottawa ee dalka Canada

Jawiga degmooyinkii dagaaladu ka dhaceen oo degan saakay

08_11_08_codkahaweenka.com , somalia

Xaalada goobihii ay shalay dagaaladu ka dhaceen ee xaafado ka mid ah degmooyinka wardhigley iyo Howl/wadaag ayaa degan iyadoo ay sii kordhayso khasaaraha dadka rayid ah dagaalkan ka soo gaartay.

Dagaalkan ayaan soo gaaray xalay fiidkii hore laakin saaka ayaa xaaladu degantahay iyadoo suuqa Bakaaraha uu saakay caadi yahay, Weeraro loo adeegsaday hubka nuucyadiisa kala duwan ayey ciidamada Itoobiya iyo kuwa dowladu ka geysteen gudaha Bakaaro, halkaasi oo ay ku geeriyoodeen in ka badan 7 iyadoo ay ku dhaawacmeen ku dhawaad 15 ruux oo dhamaantood rayid ah.

Inta laga warhayo sadex qofood oo shacab ah ayaa ku nafwaayay duqeyntaasi ay qaadeen askarta Itoobiya in ka badan toban qofoodna waa ay ku dhaawacmeen inkasta oo warar la helayo qaarkood ay tibaaxayaan in khasaarahu intaasi ka sii badan yahay

Madaafiicdaasi ayaa ahayd mid ku dhacaysay suuqa weyn ee bakaaraha iyo Agagarkiisa , shirikaadka isgaarsiinta iyo kuwa xawilaada inta badan markii ay dagaalo dhex maraan kooxaha ka soo horjeeda joogitaanka ciidamada Itoobiya iyo siyaasada DKM ayaa waxaa qasaaraha ugu badan waxaa uu ka soo garaa dad u badan haween danyar ah iyo caruur kuwaasi oo aan iinta badan iyagu haysa tasiilaadka ay dadku ku qaxaan.

Duqeyntaasi ayaa sidoo kale dad ku laayay xaafado hoostaga degmooyinka W/dhiigley, H/wadaag iyo Hodan, gaar ahaan C/kamiin iyo meelo kale waxaana ka soo gareen iyagana qasaare Naf iyo maalba leh

Beegsiga goobaha rayidku ay ku nool yihiin ee ciidamada Itoobiya iyo kuwa dowlada federaalka ayaa timid ka gadaal markii xoogaga hubeysan ee Al-shabaab ay weerar gaadmo ahaa ku qaadeen saldhigyo ciidamadaasi ay ku lee yihiin xaafada Xararyaale iyo isgoyska Folorense ee degmadaasi W/dhiigley.

xafiiska codkahaweenka.com